MGOSI ASEMA SIMBA ITAENDELEA KUPATA MATOKEO MAZURI MBELE YA MTIBWA

Baada ya kujikusanyia alama tatu na magoli mawili katika mechi yao iliyopita dhidi ya Ruvu Shooting ya Mkoani Pwani,uongozi wa klabu ya Simba umetamba kuendelea kuchomoza na ushindi kwenye mechi yao ya kesho dhidi ya Mtibwa Sugar.

Meneja wa timu hiyo,Musasa Hassan Mgosi amesema kwamba kikosi kinaendelea vizuri na maandalizi ya kujiwinda na pambano hilo linalotaraji kupigwa uwanja wa Uhuru jijini Dar es salaam.

Amesema kwamba wachezaji wote wapo vizuri na habari njema ni kwa mashabiki wa klabu hiyo ni kurejea kwa beki wao mahiri Ahamad Juma ambae amekosekana kwa majuma kadhaa baada ya kuumia kichwani alipoanguka bafuni.

Aidha Mgosi amewataka mashabiki wa klabu hiyo kuendelea kuisapoti timu yao ili iendelee kufanya vizuri kwani siku zote umoja ni nguvu.

Amesema kwamba ni vyema mashabiki hao kwa sasa wakapuuzia habari ambazo zinaandikwa kwenye mitandao mbalimbali kwani taarifa nyingi hua hazina ukweli na pia zinaleta uchochezi.