BLACK SAILORS WAIJIA JUU NDANDA

Na Sleiman Ussi,Zanzibar

Timu ya Black Sailors inayoshiriki ligi kuu soka ya Zanzibar imeijia juu timu ya Ndanda FC ya mkoani Mtwara inayoshiriki ligi kuu soka Tanzania bara kwa kumtumia mchezaji wao Majid Khamis "Dudu" bila ya kufata taratibu za usajili.

Katibu mkuu wa timu ya Black Sailors, Issa Khatib Masiku alisema kwamba uongozi wa klabu hiyo unaendelea kulifuatilia swala hilo kwani Ndanda wanapaswa kufuhamu kuwa mchezaji bado ni mali yao licha ya kujisajili katika vilabu viwili.

Alisema kwamba uongozi wa Ndanda umeidanganya TFF juu ya usajili wa mchezaji Majid Khamis hivyo wamelitaka shirikisho hilo kuwachukulia hatua kali kwa kitendo cha kushindwa kufuata taratibu za usajili.

Mchezaji huyo Ndanda walimtumia katika mchezo wao kwanza wa ligi kuu soka Tanzania bara ambapo Ndanda ilifungwa 1-0 na Azam FC huku mchezaji huyo akicheza takribani dakika 75 akivaa jezi nambari 12 , jezi ambayo hata akiwa na Black Sailors alikuwa anaitumia.